Fram undan

Stríð í Mið-Austurlöndum, glænýtt safn Gísla á Uppsölum, fjölbreytt námskeið í Frama, skógareldar í Frakklandi, brjálað veður á Bræðslunni

Glænýtt safn um Gísla Gíslason á Uppsölum verður formlega opnað í Selárdal í Arnarfirði í byrjun ágústmánaðar. Einbúinn Gísli á Uppsölum varð þjóðþekktur í upphafi níunda áratugar síðustu aldar þegar sjónvarpsmaðurinn Ómar Ragnarsson tók hús á Gísla í þætti sínum Stiklum hér á RÚV. Hús Gísla hefur á síðustu mánuðum verið gert upp og mun hýsa safnið og sá sem veit sitthvað um þetta verkefni er Kári G. Schram sem sagði okkur frá safninu og hvað fram undan væri í Selárdal.

Yfir 300.000 hafa þurft að yfirgefa heimili sín í Frakklandi og á Spáni vegna skógarelda og talið er að um 420 ferkílómetra svæði hafi orðið eldi að bráð í Frakklandi. Þetta eru meðal umfangsmestu rýminga á friðartímum í sögu Frakklands og ljóst að þetta eru einir verstu skógareldar í sögu landsins. Brynja Huld Óskarsdóttir öryggis- og varnarmálasérfræðingur var á ferðalagi um Frakklandi um nýliðna helgi og lýsti óhuggulegri upplifun sinni á samfélagsmiðlum þar sem hún flúði Bordeaux í gulgráu landslagi, drunga og brunalykt.

Frami er nýr vefskóli sem byggir á þeirri sýn að menntun eigi að vera aðgengileg alla ævi. Frami býður upp á fjölbreytt námskeið m.a. á sviði tækni og forritunar, heilsu og vellíðan og ritista og bókmennta svo eitthvað sé nefnt. Í ágúst verður einnig boðið upp á krakkasmiðjur fyrrir börn á aldrinum 9–12 ára þar sem þau fá að kynnast hugarfari, sögum, tækni og fjármálalæsi. Kristín Hildur Ragnarsdóttir framkvæmdastjóri Frama kom til okkar og sagði okkur allt um þennan nýja vefskóla og hvað er þar í boði.

Augu heimsins beinast þessa dagana að í Mið-Austurlöndum. Hlé hefur verið á stríði Írans og Bandaríkjanna síðustu nætur. Nóttin í nótt var sú þriðja í röð þar sem ekki berast fregnir af árásum milli ríkjanna vegna deilna um Hormússund sem liggur á milli Persaflóa og Ómanflóa. Vonir hafa kviknað að friðarsamingar náist. Það eru fáir íslendingar sem þekkja þessi mál jafn vel og Erlingur Erlingasson hernaðarsagnfræðingur. Hann er búsettur í London en er staddur hér á landi og mætti til okkat í hljóðver.

Austfirðingar hafa upplifað einmuna veðurblíðu upp á síðkastið og höfðu því skipuleggjendur tónlistarhátíðarinnar Bræðslunnar á Borgarfirði eystra vaknað upp í sól og blíðu í undirbúningsvinnunni síðustu vikurnar. Það kom því afar flatt upp á Bræðslufólk að mæta allt í einu slagveðri, norðvestan roki og rigningu þegar hátíðin fór loks af stað um nýliðna helgi. Áskell Heiðar Ásgeirsson er einn af Bræðslustjórunum, er með meirapróf í viðburðahaldi en þurfti að takast á við krísustjórnun á hátíðinni í ár.

Birt

27. júlí 2026

Aðgengilegt til

Rennur ekki út

• 00:09:16 Glænýtt safn Gísla á Uppsölum
• 00:29:54 Skógareldar í Frakklandi
• 00:43:01 Fjölbreytt námskeið Frama
• 00:59:37 Erlingur Erlingsson um stöðu heimsmála
• 01:19:40 Brjálað veður á Bræðslunni

Þau Urður Örlygsdóttir og Kristján Freyr Halldórsson líta yfir allt það helsta sem fram undan er í fréttum, mannlífi og menningu í sumar.