Orð af orði

Spjallmenni sem kann íslensku

Þegar fréttir bárust af því að íslenska væri annað tungumálið sem mállíkanið GPT4 talaði braust þjóðarstoltið rækilega út, ekki ósvipað og þegar Íslendingum vegnar vel á stórmótum í íþróttum. Íslenska þótti þarna loksins eiga kost á að standa jafnfætis alheimsmálinu ensku. Einar Freyr Sigurðsson, rannsóknarlektor á orðfræðisviði hjá Stofnun Árna Magnússonar í íslenskum fræðum, og Iris Edda Nowenstein, nýdoktor í málvísindum við Háskóla Íslands og talmeinafræðingur á Landspítalanum, eru meðal þeirra sem hafa skoðað hversu vel spjallmennið Chat GPT kann og skilur íslensku.